【港女鬧男朋友只肯比房租，拍拖唔比錢r著數好肉酸】
無論男定女都有cheap精，所謂cheap精就係拍拖r著數，仲要斤斤計較，呢啲最黑人憎！
呢排連登有個post睇到火都黎，出post者既女仔朋友話男朋友講到明佢地第日如果搬出黎住，男方就負責交租，女方就負責水電雜費。正常咁聽都覺得：唔係呀嘛，租都成萬蚊，依家女方有份住都只係比一兩千蚊，咁唔公平🙂個女仔朋友都覺得唔公平，但佢既諗法同正常人完全相反！佢話男朋友要平等好辜寒，佢作為男人應該要比曬添。
其實之前呢個女仔朋友已經好斤斤計較，請左男朋友一餐飯已經搵出post者呻左成日，又指佢朋友搭完的士會搵男朋友拎返錢，簡直一擔擔。所以出post者聽完覺得女仔朋友同佢啲朋友好怪，話明唔會付出，一蚊都唔會比，咁樣同比人包、做妓女冇乜分別。出post者話：「我覺得一段關係應該睇返大家經濟能力，邊個能力大咪出多少少，最重要係大家開心，究竟係我有問題定真係依家全部香港女仔都係咁？」
之前喺《有樓萬事足》講過「冇樓既話就唔好白撞」、「有樓就有高潮」等金句既Seasun真係一模一樣。當時Seasun喺訪問度一致表現出理所當然既態度，多次明言冇二千呎大屋就唔會同人一齊，如果Seasun係有樣都可能成立，不過問題係佢唔係好靚，咁又有咩條件去揀人呢？
講真，男朋友如果有能力又自願想養女方係一件事，咁係佢份人好有風度，但個女仔心態真係唔好奉旨！依家有唔少港女都好現實，完全唔想有付出就想有回報，成日要男仔付出多啲，要男仔就佢地，另一方面又講女權，宣揚男女平等，簡直輸打贏要。
其實我唔明AA制有咩問題，有份一食、有份用，又唔係冇手冇腳，又唔係乞兒。好似我同男朋友就次次都AA，一係呢餐我比，下餐佢比。當然我唔係讚自己係咩清泉咁on9，因為錫對方就會肯咁做架啦，想佢冇咁大壓力，付出返自己嗰份都好應份。有巴打講得好啱，講真你點對人，人點對你，所以繼續同呢啲人傾盞自己煩，唔好理，等佢醒覺甚至冇人要算數。
如果要r著數，又比你搵到個有錢仔肯貼錢我冇野講。但睇下林峯同吳千語，一齊左5年請佢去旅行、買名牌、買樓，最後咪又係頂唔順分手💁🏻♀️所以唔好當身材同樣係r著數既本錢，去到最後睇下邊個笑到最尾。
Search